“Tatuaxes nel corazón”, Marisa López Diz

Premiu María Josefa Canellada de Lliteratura Infantil y Xuvenil 2013

Premiu María Josefa Canellada de Lliteratura Infantil y Xuvenil 2013

Un relatu, ilustráu por Ruma Barbero, que cuenta con muncha chispa les esmoliciones d’una rapaza de quince años que s’enfrenta a dellos problemes de personalidá y la so particular manera de resolvelos. Mui recomendable llectura pal públicu adolescente asturianu, que se va a entender de mieu cola protagonista d’esti llibru. Tien quince años, una llunar del tamañu d’una llenteya nel papu izquierdu y un piercing na nariz; suma los númberos de les matrícules de los coches, nun-y gusten nin Justin Biever nin Shakira nin la ropa de marca, pero sí’l rap, les pelis de mieu, los dibuxos manga, lleer y los frixuelos rellenos de chicolate, ¿o non? Pue ser que nun s’asemeye muncho a ti, igual nun vos presten les mesmes coses, pero a ella va da-y lo mesmo.

Marisa López Diz (Xixón, 1970) ye llicenciada en Filoloxía Hispánica y especialista n’asturianu y gallego-asturianu, llingües les dos —xunto col castellanu— nes qu’escribe davezu poesía y narrativa tanto pa neños como p’adultos. Tien ganao abondos premios lliterarios, ente los que destaquen el Fernán Coronas (1998), Cuentos pola Oficialidá del Asturianu (1998), l’Elvira Castañón (2001), el Premio Xeira (2007), el Premiu de la Crítica (2007), el de Poesía Minera (2012), Relatos de la Mar (2012) o l’Urogallo de Bronce del Centru Asturianu de Madrid (2013) na categoría de llingua asturiana, amás d’otros premios y menciones tanto n’Asturies como a nivel nacional. Nel xéneru poéticu tien les obres Tiempu de tristura (1998) y A terra esqueicida (2007), n’asturianu y gallego-asturianu respectivamente. En cuantes al xéneru infantil, publicó los llibros Poemes de Carambelu (2006), Binoca (2008), Poemas de Caramelo (2009, en castellanu), Malva y el paragües máxicu y Malva y el papapallabres (2010). Nel 2012 estrenó’l curtiumetraxe A fiya del xastre, que recibió’l premiu al meyor curtiumetraxe rodáu n’Asturies «Ribadedeva Rec» (2014). L’otru campu artísticu nel que trabaya ye la música: forma parte del dúu Mestura, col que tien cuatro discos publicaos, Agua del norte (2006), Poemes de Carambelu (2008, n’asturianu), Poemas de Caramelo (2013, en castellanu) y A terra esqueicida (2013, en gallego-asturiano), esti últimu inspiráu en poemes del so llibru homónimu.

Impronta / Gobiernu del Principáu d’Asturies

978-84-941318-5-1

P.V.P. 10,00 euros

Anuncios