“Ricinos doraos y los tres osos tranquilos”, de Robert Southey

Cubierta Ricinos doraos

La neña rizosa y revolvina que protagoniza esti cuentu ye mui amiga de facer descubrimientos nel so tiempu llibre. Nada-y presta más qu’investigar nésto y naquéllo y esclucar pequí y pellí. Pero delles veces valía-y más dir con cuidáu. Por exemplu, nunca ye bona idea metese en casa de desconocíos ensin el so permisu. Suerte qu’esta vez los dueños yeren una familia d’osos mui pacíficos y tranquilos.

Versión en llingua asturiana d’Irene Riera. Ilustraciones de María Perera.

ISBN 978-84-949873-8-0 / PVP 12,00 € / Pa llectores dende los 5 años / IBIC YBC – YFJ / Álbum ilustráu, tapa dura, 23 x 23 cm / Cola ayuda de la Conseyería d’Educación y Cultura del Principáu d’Asturies

“Cállanos con esa música”, de Diego Solís

Cállanos con esa música-CubiertaCállanos con esa música ye un llibru distintu a los anteriores del autor, onde los poemes nun traten de conformar una estructura, sinón que son les composiciones d’un momentu puntual y crucial que dan pie a una poesía crítica y reflexiva pa col propiu llinguax y la propia poética. Poro, entemécense poemes n’asturianu y castellán, apaecen dalgunos clásicos que se reinterpreten y distintos enfoques críticos que rematen nuna búsqueda de la conexón pa cola tierra, cola paz interior: esa música que debía callanos y dacuando, por suerte, consíguelo.

Diego Solís (Xixón, 1991) graduóse en Lengua Española y sus Literaturas pola Universidá d’Uviéu y acabó’l máster n’Estudios Avanzaos en Lliteratura Española ya Hispanoamericana de la Universidá de Barcelona. Ye escritor en castellanu y asturianu, codireutor de la revista Formientu, autor del poemariu en castellán Hágase abril y del llibru de poemes n’asturianu Y el mundu marcha.

ISBN 978-84-949873-4-2  / PVP 10,00

Premiu Asturies Xoven de Poesía 2018

 

“El visitante impropiu”, de Manuel García Menéndez

El visitante impropiu-Cubierta

Son los díes previos a la primavera de 1890 y l’inspeutor especial Marcos Engrueba, bon amigu de les nueches de xaréu y xuegu, entretién los díes en dir zarrando, ensin mayores problemes, dellos casos xunto colos sos collaboradores de la policía gubernativa de Madrid. Pero los superiores d’Engrueba tienen pa él planes bien distintos: deciden unvialu a Uviéu col encargu de resolver lo qu’hai quien define como «un asesinatu espantible», que paez que se‑yos ta travesando a los responsables iniciales de la investigación. Les razones de los xefes pa sacar a Engrueba del so acomodu en Madrid son variaes: ye fíu d’asturianos, ye espertu en delles de les téuniques d’investigación policial más avanzaes que se conocen na Europa de la época, y ta avezáu a resolver crímenes cuando medien implicaciones polítiques, como paez qu’ocurre nesti casu. A traviés de les páxines d’El visitante impropiu conocemos les idees y los métodos de Marcos Engrueba y cómo se rellaciona colos policíes que tienen que se poner baxo’l so mandu, pese a que lu consideren un intrusu, y con dellos personaxes de la sociedá uviedina a los que va tratando por trabayu o por fuelga. Y descubrimos les claves qu’en rellación col crime va dándonos la historia, contada de forma paralela, de Xulián Prieto, un mozu que ta a xornal na estación del Norte d’Uviéu.

Manuel García Menéndez (Uviéu, 1962) ye llicenciáu n’Historia. Nos años ochenta publicó dos obres de lliteratura infantil na coleición Escolín de l’Academia de la Llingua Asturiana: Corcuspín el Rozcayeiru (1984) y Delina nel valle’l Faloupu (1985). Nel añu 2013 editó la que pue considerase la so primer novela: La Sienda del Amigu Feliz, que describe un viaxe iniciáticu pelos caminos y montes de l’Asturies de posguerra. Tres ganar, nel añu 2018, la XXXIX edición del Premiu Xosefa Xovellanos de Novela con El visitante impropiu, nel añu 2019 publicó El faru de Gram, novela curtia d’ambiente nordic noir. En tou esti tiempu, dende que volviera a publicar nel 2013, siguió escribiendo cuentos o rellatos curtios. Como exemplu de la so contribución al xéneru ta pa salir, con Impronta, la coleición de rellatos Néctar dulce son los llevantos.

Premiu “Xosefa Xovellanos” de Novela 2018. Coedición con la Conseyería d’Eduación y Cultura del Principáu d’Asturies

ISBN 978-84-949873-7-3 / PVP 16,95€  / IBIC FA

Pidíos: https://goo.gl/hC0sNA

“Tres beyuscos”, de Sidoro Villa Costales

Trs beyuscos-cub

Tres beyuscos ye la segunda novela de Sidoro Villa, dempués de la orixinalísima A estaya, que mereció les meyores crítiques y el sofitu de los llectores. Vuelve afondar equí l’autor na so personal mestura ente comedia y drama. Rescampla tamién l’humor negro, por cuenta d’una escapada de risión, pero van enriestrándose nel relatu munchos más ingredientes. Nun falta’l simbólicu atropellu d’un ser inocente —a manes del discutible progresu ferroviariu astur— y el maxistral remate marcáu pola presencia dominante de la naturaleza, nesti casu los beyos y cambriales del conceyu de Ponga. Con too y con eso, Tres beyuscos ye amás una emocionante novela d’amor, protagonizada por unos cuantos perdedores, nel contextu d’una Asturies onde namás la mesma naturaleza va ser quien a devolver l’orde verdaderu a les persones y a les coses. La naturalidá del rexistru llingüísticu, marca de la casa de Sidoro Villa, fai que domine tamién como naide los retratos de calteres, les descripciones y los diálogos.

Sidoro Villa Costales (Lieres, 1962) ye profesor de primaria, ilustrador y escritor. Atendiendo pa esi ámbitu, tien publicaos dellos llibros infantiles y xuveniles: Llibru de los suaños (2007), ¡Nun-yos tengas perceguera! (2006), Mael al debalu (2010), Evaristo Valle, el pintor del antroxu (2011). Debutó como novelista con A estaya (Impronta, 2016), onde l’allegría y el bon xuiciu intenten nun se fundir braciando ente foles de soberbia y de maldá, nun escenariu apocalípticu de vallines fonderes y bastiazos nel que la naturaleza, omnipresente, algama un papel protagonista.

ISBN 978-84-949873-3-5  / PVP 14,00 euros
Cola ayuda de la Conseyería d’Educación y Cultura del Principáu d’Asturies

“De par en par”, de Marina Lobo

CUBIERTA DE PAR EN PAR

Andar siempre sola, o solu, pela vida nu diba ser bona idea pa naide. Pero hai coses qu’ensamás se dexen ver sueltes o soles. Tampoco les verás nuna apetiguñaes o a montones. Elles namás se presenten en sociedá xuncíes, de dos en dos, de par en par.

IBIC:  YBLA1 (Aprendizaxe tempranu: les primeres pallabres) / Prellectores (0 a 3 años)

Formatu: 16 x 16 cm. 24 páxs. color. Tapa dura

ISBN: 978-84-948795-4-8 / PVP: 10,00 euros

Cola ayuda de la Conseyería d’Educación y Cultura del Principáu d’Asturies

“En filera”, de Marina Lobo

Cubierta En filera

L’orde de les coses nun siempre tien que ser el mesmu. Delles veces presta veles toes amontonaes, apetiguñaes, o una per cada llau, pero otres veces tán muncho meyor les unes coles otres, bien puestes en filera.

IBIC:  YBLA1 (Aprendizaxe tempranu: les primeres pallabres) / Prellectores (0 a 3 años)

Formatu: 16 x 16 cm. 24 páxs. color. Tapa dura

ISBN: 978-84-948795-4-8 / PVP: 10,00 euros

Cola ayuda de la Conseyería d’Educación y Cultura del Principáu d’Asturies

“Vida nel campu”, de Berta Piñán

X Premiu «María Josefa Canellada» de Lliteratura Infantil y Xuvenil. Promueve: Conseyería d’Educación y Cultura. Dirección Xeneral de Planificación Llingüística y Normalización. Editen: Conseyería d’Educación y Cultura / Impronta

Ilustraciones: Alberto Pieruz

La protagonista d’esti cuentu ta acabante descubrir lo prestoso que ye facese mayor na ciudá pero, por circunstancies, tien que marchar cola so familia a vivir nel campu. Ella pensaba qu’ellí la vida diba ser tamién igual o más prestosa que lo yera na ciudá, pero…

Les neñes y los neños que s’animen a adientrase nesti preciosu llibru —precisamente escritu pola poeta Berta Piñán y guapamente ilustráu por Alberto Pieruz— van garrar fuerte la mano de la protagonista pa facer un viaxe aniciáticu onde nun faltarán les sorpreses pero, sobre too, delles llecciones vitales qu’enxamás serán a escaecer.

L’autora quixo dedicar esta exemplar historia a «les neñes y los neños que busquen un llugar a salvo de la violencia, del odiu y de la guerra».

ISBN 978-84-948795-7-9 / PVP 15,00€