“Vides célebres y otros cuentos chinos”, de Pablo Antón Marín Estrada

Pablo Antón Marín Estrada apurre nesti nuevu llibru una gaviella de relatos que dexen el tastu dulce y antiguu de les histories, fechos y asocedíos de tresmisión oral, aquellos que se contaben antaño a la par del fueu. Y eso que l’autor mece equí maxistralmente los tiempos y la ficción cola non ficción, pero siempre gastando namás que les pallabres precises y un migayu d’esa rara materia de la que tán fechos los suaños, los del autor y los de los llectores. N’orde y conciertu, vamos sabiendo coses y casos de llugares, dómines y tipos de toa especie y condición. Déxense ver per estes páxines xente como Lady Godiva y Superman, Ulises y Elvis Presley, Emily Dickinson y Lluis de Baviera, Don Juan Uría y Antonio Machín, Faustino Goico Aguirre y la Virxe de Cuadonga, la vaqueira entendida y l’últimu vendedor d’enciclopedies. Pasen y llean.

Pablo Antón Marín Estrada (Sama, Llangréu, 1966) ye un de los autores fundamentales de les lletres asturianes: poeta, narrador, diarista, traductor, periodista, lletrista musical…, dende los albores del Surdimientu vien edificando una obra tan ambiciosa como personal y acoyedora pa los llectores. Llibru a llibru, la so escritura algamó un altor qu’almite poques comparances ente los sos contemporáneos. El so talentu narrativu rescampla igual nel llargu aliendu de La ciudá encarnada (1995) o Los caminos ensin fin (2000) que nel curtiu percorríu de Xente d’esti mundu y del otru (1992), Un palaciu enllenu ortigues (2014) o Fábules humanes (2015). Tresponedor al so propiu mundu de referencies de la veta y de la vena galaica de Castelao, Cunqueiro o Casares, Marín Estrada concibe’l relatu como un espaciu autónomu onde viven o reviven persones y criatures de toa triba, reales o imaxinaries, surdíes lo mesmo de la realidá que de los llibros, de l’alcordanza o del mitu.

ISBN 978-84-122870-1-1 / 296 páxs. / PVP 17,00 euros / THEMA FYB / Cola ayuda de la Conseyería de Cultura, Política Llingüística y Turismu del Principáu d’Asturies