“Al sol de medianueche”, de Luis Salas Riaño

Al sol de medianueche-CubiertaLlibertina y lluxuriosa, lluminosa o desengañada, la poesía de Luis Salas ye too eso y muncho más. Un mundu propiu onde la realidá ye’l deséu y onde gobierna’l celu, que se consuma o lu consume, pero que siempre arde en fueu xubilosu d’un erotismu que nun tapez del too la fondura llírica, sentimental y social d’un poeta con personalidá propia.

Poesía llibre pero na xusta midida, desenfrenada pero adomada pol metru, pol ritmu y pola rima, envasada con procuru y maestría nel formatu poéticu más clásicu y reconocible. Nesti cientu y mediu de sonetos remansa y aposienta l’anoxu y el rixu d’un autor únicu na lliteratura asturiana d’anguaño y de siempre.

Luis Salas Riaño (L’Infiestu, 1960) estudió Maxisteriu na Universidá d’Uviéu y dende 1982 participó activamente nes primeres reuniones y publicaciones de la Tertulia Oliver, de la que fue fundador. Daquella traduxo al castellanu a Prévert, Verlaine o Apollinaire y escribió los poemes de Fragmentos de metro incierto (1985) y los cuentos de Viernes santos (1986). Dende los años noventa vive en Asker (Noruega) onde ye profesor. En Noruega traduxo al asturianu dos obres clásiques de la lliteratura nórdica: Cuentos populares noruegos (1990) y Peer Gynt, d’Ibsen (1991). Ellí escribió tamién los relatos de A teyavana (1996), los poemes de La llingua encesa (2004) y los d’esti Al sol de medianueche (2016).

ISBN 978-84-944718-2-7   /   PVP 12,00 euros

Cola ayuda de la Conseyería d’Educación y Cultura del Principáu d’Asturies
Anuncios